BAGUIO CITY – Naragsak ita ti kapamilya ni Delio, sigud a rebelde kalpasan a nagsubli iti sidong ti gobyerno idiay Brgy. Irisan, Baguio City idi kalman, July 1.
Sigud a miyembro ti Communist Terrorist Group – New People’s Army ti 57-anyos a surrenderee.
Maibasar iti imbestigasyon, nakipaset ni Delio iti nasao a grupo idi tawen 2003 ken nagserbi kas contact ti makakannigid a grupo idiay Gumhang, Tinoc, Ifugao.
Miyembro metlaeng daytoy ti Kilusang Larangang Gerilya – Ifugao ken Kilusang Larangang Gerilya “Ampis” idi tawen 2018.
Nag-operate ti grupo dagitoy idiay Ifugao, Mountain Province ken Baguio City agingga Hunyo, iti agdama a tawen.
Impaima ni Deluo ti maysa a .45 caliber handgun, sumagmamano a live ammunition, ken maysa a fragmentary hand grenade.
Ti panasuko ni Delio ket indauloan ti Regional Mobile Force Batallion 15, PNP – Special Action Force, Baguio City Police Office ken dadduma pay a unit ti pulisya.
Kabayatanna, manamnama a maipasidong ni Delio iti enhanced Comprehensive Local Integration Program (E-CLIP) babaen iti tulong ti Department of the Interior and Local Government.
