BAGUIO CITY – Nanayonan pay ti bilang dagiti nursing students iti lokalidad a nagpositibo iti COVID-19.
Sigun kenni Commission on Higher Education (CHED) – Cordillera Regional Director Demetrio Anduyan Jr., dumanonen iti 26 ti bilang dagiti estudyante ti nursing ti higher education a nagpositibo iti COVID-19 kabayatan ti internship dagitoy.
Kinunana a ti kaudian kadagitoy ket ti innem a nursing students a nag-intern iti Bontoc General Hospital sadiay Bontoc, Mountain Province.
Naamuan met a sabali a batch ken pagadalan ditoy siudad ti nagtaudan dagiti innem nga estudyante malaksid pay a fully vaccinated amin dagitoy.
Nupay kasta, tallo kadagitoy ti nakitaan ti sintomas.
Dagus met a naipasidong dagiti maseknan nga estudyante iti isolation ken quarantine iti mismo a Bontoc General Hospital bayat a dagiti kakadwada a nag-negatibo iti virus ket naka-quarantine met iti boarding houses dagitoy.
Inlawlawag ni Anduyan a negatibo ti resulta ti COVID test dagiti nasao a nursing students sakbayda a nagturong sadiay Bontoc ngem kasaruno ti damag a panagpositibo dagiti nursing students ti UB a napan sadiay Bauko ket naisayangkat ti maikadwa a rikos ti COVID testing a nagresulta iti panagpositibo dagiti innem.
Innayonna a nainget ti panangwanawan dagiti Clinical Instructors kadagiti nasao nga estudyante ken nainget ti koordinasyon dagiti maseknan a lokal a gobyerno ken pagadalan para iti panakaipaay ti tulong kadagiti estudyante.
Immuna metten a nakumpirmar ti panagpositibo iti COVID-19 ti 19 a nursing students ken maysa a Clinical Instructor ti University of Baguio a nagturong iti Luis Hora Memorial Regional Hospital sadiay Bauko, Mountain Province para iti internship dagitoy.
Sigun kenni Anduyan, fully vaccinated amin dagiti estudyante ti UB ken addan ti nakasagana a 14 a vans a mangibyahe kadagitoy pasubli ditoy siudad kalpasan ti quarantine period dagitoy.
Innayonna a gapu kadagitoy nga insidente ket kitaenda no maituloy pay ti internship dagiti nursing students ken mangipatungpalda ti debriefing kadagiti nasao nga estudyante.
