BAGUIO CITY — Nakemmeg ti innem a tattao, pakairamanan ti maysa a menor de edad kalpasan a naaktuwan ti panagaramatda iti iligal a droga sadiay Betag, La Trinidad, Benguet.
Nabigbig dagitoy a da Beljimar Botic, 20; Erickson Bucang, 23; Jeric Bittong, 19; Xaxunyro Ocampo, 27; Jideon Manzano, 49; Rogen Bangoy, 18 ken maysa a menor de edad a babae; bin-ig a residente ti La Trinidad, Benguet.
Naamuan a ti nakemmeg a ni Manzano ket sigud a drug surrenderee ti Baguio City Police Office.
Nakaawat dagiti pulis iti impormasyon nga adda ti mapaspasamak a pot session wenno panagaramat iti iligal a droga iti maysa a boarding house sadiay Betag, La Trinidad, Benguet.
Dagus a nangisayangkat dagiti operatiba iti follow-up operation a nagresulta iti panakakemmeg dagiti nasao a suspek.
Nakumpiskar manipud kadagitoy ti 12 a pakete ti mapapati a shabu ken nagduduma a drug paraphernalia.
Naala ti tallo a pakete ti mapapati a shabu kenni Manzano, walo kenni Pittong ken maysa kenni Ocampo.
Sumangsango ita dagiti suspek iti kaso a panaglabsing iti RA 9165 wenno ti Comprehensive Dangerous Drug Acts of 2002.
