Nakakolekta iti 645.1 kilo nga electrical ken electronic waste wenno e-waste ti siudad iti Baguio iti las-od laeng iti 13 nga aldaw ita a bulan, a mangipakita iti dumakdakkel a public awareness iti proper waste segregation.
Manipud iti pakabuklan a nasurok 600 a kilo, 544.9 kilo ket manipud iti 10 a barangay iti siudad ken ti nabati a 100.2 a kilo ket nakolekta bayat iti Ecological Waste Management and Sustainability Fair a naipatungpal manipud Septyembre 11 agingga Septyembre 13.
Sigun iti City Environment and Parks Management Office (CEPMO), dagiti nakolekta ket pakairamanan dagiti unserviceable printers, laptops, telecommunications equipment, laminators, monitors, insect killers ken fax machines.
Imbinglay met ni CEPMO Assistant Head Marivic Empiso a dagiti nakolekta ket nakilo, nainventory, ken naiturong sadiay Bakakeng Central Treatment, Storage and Disposal-Materials Recovery Facility (TSD-MRF) para iti natalged a disposisyon dagitoy.
Ti ewaste ket naglaon kadagiti hazardous substance kas iti mercury, lead, cadmium, ken arsenic a mabalin a mangkontamina iti danum a mangitunda iti pangta iti salun-at ken aglalaw.
Sigun Baguio City Mayor Benjamin Magalong, panggep ti siudad a makissayan ti waste generation iti 20% babaen iti circular economy program, a mangitatandudo iti waste reduction, reuse, ken repurposing.
Ginugugoy met ti CEPMO ti publiko nga iturongda dagiti e-wastes dagitoy idiay Bakakeng Central TSD-MRF iti ruar ti regular eco-fairs.// via Bombo Khey
