BAGUIO CITY – Agtaltalinaed nga apektado iti iligal a droga ti innem a pulo ket pito a barangay iti rehion Cordillera.
Daytoy ti imbinglay ni Rosel Sarmiento, Public Information Officer ti PDEA-Cordillera iti panakiuman ti Bombo Radyo Baguio.
Manipud iti nasao a bilang, dinakamatna a 33 a barangay sadiay Abra ken dua a barangay sadiay Kalinga ti saan paylaeng a nadalusan manipud iti iligal na droga.
Gapu iti daytoy, kinunana a kasapulanda ti tulong ken partisipasyon ti barangay officials, lokal a gobyerno ken pribado a sektor tapno in-inot a madalusan dagiti apektado a barangay.
KABAYATANNA, imbinsa ni Sarmiento nga adda ti nagduduma nga interbension nga ar-aramidanda para kadagiti drug surrenderees ken kadagiti drug users/pushers nga agtarigagay a mangabaruanan.
Dinakamatna a maipasidong dagitoy iti eksaminasyon tapno maduktalan dagiti kaskenan a tulong a maipaay kadagitoy.
Kinunana pay a maipaisidong iti rehab dagiti drug surrenderees ken dagiti natiliw nga indibidual agingga a makompletoda dagiti kaskenan a proseso sakbay nga agturposda ken agsublida manen iti sidong ti pamilyada.
Gapu iti daytoy, al-allukoyen ni Sarmiento dagiti drug users/pushers tapno boluntaryo a sumukodda kadagiti otoridad gaputa nakasagana ti opisinada a mangipaay ti kaskenan a tulong.
Kidkiddawenna met ti panakipagmamaysa dagiti opisyales ken dagiti umili iti kampanya kontra iti iligal a droga tapno maideklara ti Cordillera kas drug free region.
