BAGUIO CITY – Pimmusay ti 7-anyos a lalaki kalpasan a nadungpar ti lugan idiay Sitio Antamok Sur, Camp 3, Tuba, Benguet idi May 30.
Ti nasao nga insidente ket nakairamanan ti hilux pick-up nga imanmaneho ti 40-anyos a lalaki a mannalon, ken residente metlaeng ti nasao a lugar.
Maibasar iti imbestigasyon, agay-ayam ti biktima kadwana dagiti gagayyemna idi kellaat a timmaray daytoy paturong iti bangir a paset ti kalsada a nangitunda iti panakadungparna iti nasao a lugan a paturong iti national road.
Dagus met nga intaray ti driver ti ubing iti ospital para iti panakataming ti nadangran a nagduduma a paset ti bagi daytoy.
Ngem kalpasan ti sumagmamano nga oras ket pimmusay metlaeng daytoy nga indeklara ti attending physician iti nasao nga ospital.
Kabayatanna, napilaan ti kaso a Reckless Imprudence Resulting in Homicide ti driver ngem nawaya-wayaan metlaeng daytoy kalpasan a binayadanna ti piyansa-na a P36,000.//Bombo Jez Lapizar
