BAGUIO CITY – Nakemmeg ti pito nga indibidual iti dua nga aldaw nga operasyon kontra kadagiti iligal nga aktibidad iti entero a rehiyon Cordillera.
Nakemmeg iti buy-bust operation sadiay Zone 5, Bangued, Abra ni Jessie Basa Rindon, 21-anyos ken residente ti Zone 3, Poblacion, Bagued, Abra idi kanikadua.
Nakumpiskar kenkuana ti uppat a pakete ti maatap a napagango a bulong ti marijuana, P1,000 a marked money ken ti tricycle nga inaramat ni Rindon.
Nakemmeg met ni Elmer Adolfo Pakyas, 30-anyos, residente ti Sadsadan Trail, Bauko, Mt. Province babaen iti bileg ti search warrant idi Martes.
Nakumpiskar iti pagtaenganna ti maysa a pidaso ti caliber 22 pistol, maysa a 1 magazine ti caliber 22 pistol a naglaon ti innem a bala, maysa a pakete ti maatap a shabu ken nagduduma a drug paraphernalia.
Nakemmeg met sadiay Purok 22, San Carlos Heights, Irisan, Baguio City ni Nelson Rivera Villanueva, 62-anyos, residente ti Manaoag, Pangasinan kalpasan a nakumpiskar kenkuana ti caliber 45 ken dua a magazines ken walo a bala.
Nakemmeg met idi kanikadua ni Yun Gerold Latorre Yango, 25-anyos sadiay Dominican Hill, Baguio City gapu iti kasona iti iligal a droga nga awanan ti piyansa.
Nakemmeg pay ti tallo nga indibidual gapu iti iligal a panagsugal dagitoy iti pagtaengan ti maysa kadagiti nakemmeg sadiay Calot, Banangan, Sablan, Benguet idi rabii ti Martes.
Nabigbig dagitoy a da Emmanuel De Leon, 64-anyos; Dolores Palaci, 63-anyos ken ni Julieta Abaring, 52-anyos, bin-ig a residente ti Banangan, Sablan, Benguet.
Nakumpiskar kadakuada ti inaramatda a baraha ken P1,350 a taya.
Sigun kenni Police Regional Office Cordillera regional director PBGen Israel Ephraim Dickson, dagiti nasao a balligi nga operasyon ti mangipakpakita a saan nga agsarsardeng dagiti pulis iti rehiyon a mangimplementar kadagiti linteg tapnu makemmeg dagiti lawless elements iti kagimongan. (-with Cordillera PNP)
