BAGUIO CITY – Dumanon iti 8,000 a license plates ti naawat ti Land Transportation Office a naituding a maiwaras kadagiti agtagikua iti motorsiklo a nakarehistro iti Cordillera manipod 2018.
Sigun ken LTO-CAR regional director Francis Ray Almora, dumanon iti 71,086 a motorcycle plates ti manamnama a maiwaras kadagiti nagparehistro manipod June 2016 aginnga June 30, 2020.
Inlawlawagna nga intunda ti temporary restraining order (TRO) nga impaulog ti Supreme Court (SC) ken iti notice of disallowance manipod iti Commission on Audit (COA) idi 2016 ti nabayag a panangiwarasda kadagiti plaka.
Malaksid iti dayta, inuray pay ti LTO ti pinal a desisyon para iti disenyo dagiti plaka tapnu maitunos iti pagalagadan ti Republic Act (RA) 11235 wenno iti Motorcycle Crime Prevention Act of 2019.
Maipalagip a nabaliwan ti disenyo ti plaka dagiti motorsiklo nu sadino a nagbalin daytoy a dakdakkel nu idilig iti sigud a kita dagiti plaka, color coded ken addaan iti radio frequency identification (RFID) sticker, QR code ken reflectorized sheeting
