BAGUIO CITY – Balligi ti panakarambak ti 9th Ava Festival idiay Tuba, Benguet kagiddan ti panagleppasna ita nga aldaw, Setyembre 20.
Iti nasao a festival, naibida dagiti nagduduma a Mini-Agri fair a naitampok ti sangapulo ket tallo a barangay iti nasao a municipyo.
Iti nasao a fair, kasapulan a buklen daytoy ti 70% ava products ken 30% a daduma pay a produkto sadiay.
Sigun kenni Flordelizo Abance, Municipal Agriculturist, tunggal tawen a maipatpatungpal ti Ava Festival iti bulan ti Setyembre nu sadino dagiti nakapokus dagiti aktibidad iti panangallukoy kadagiti mannalon ti ava nga agprocess met dagitoy.
Kagiddan daytoy ti panangallukoyna kadagiti ava farmers babaen kadagiti aktibidad iti nasao a festival tapno makaaramid iti sabali a produkto ken para metlaeng iti nangatngato a pamastrekan dagitoy.
Malaksid iti dayta, kinuna ni Abance a panggep ti nasao nga event nga allukoyen dagiti mannalon nga agnegosyo babaen iti panagmula ken proseso iti nasao a produkto.
Sumagmamano kadagiti naiproseso a produkto ket ava cake, ava pie, ava chips, ava pizza, ava empanada ken daduma pay.
Kabayatanna, kinuna ni Abance nga agkurkurang ti processing equipments dagitoy nu sadino puntirya-da nga idevelop tapno ad-adda pay a maallukoy dagiti daduma a mannalon nga agmula ken agproseso ti ava.
