BAGUIO CITY – Inaprobaranen ti Commission on Higher Education en Banc ti aplikasyon dagiti pito a Higher Education Institutions wenno pribado a pagadalan ti kolehiyo ditoy rehion a nagaplikar para iti panakaipangato ti matrikula ita nga school year.
Sigun kenni Patricio Dinamling, Tuition and Other Fees Coordinator ti CHED-Cordillera, immunan nga inaprobaran ti Central Office ti aplikasyon ti tallo a pagadalan iti rehion partikular ti Saint Louis College Bulanao sadiay Kalinga a nangipangato iti 10%, Divine Word College sadiay Bangued Abra a 14% ken ti STI College Baguio a 5%.
Inlawlawagna a dagiti nasao a pagadalan ket nagaplikar iti panakaipangato ti tuition fees ken dadduma pay a babayadan para iti amin a year levels ken amin a programa wenno kurso isut gapuna a dimmalan pay daytoy iti deliberasyon iti CHED en banc.
Malaksid kadagiti nasao a pagadalan ket direkta nga agipangato met iti tuition fees ti Cordillera College Development College, University of the Cordilleras, Saint Luis University Baguio ken ti Baguio Central University para kadagiti sumrek iti umuna a tawen ti kolehiyo.
Kinunana nga iti proseso dagiti dadduma a pagadalan ket saanen a kasapulan ti desisyon ti Central Office dagitoy gaputa dagiti laeng freshmen ti maapektaran iti tuition fee increase.
Inlawlawagna met a direkta a maaprobran ti aplikasyon dagiti pagadalan nu sinurotda amin a proseso kas iti panangipatungpalda iti konsultasion kadagiti maseknan nga stakeholders, panangiparangda iti umno a notice ken naipaayan ti CHED iti kopya ti proposal dagitoy.
