BAGUIO CITY – Sinuspendir ti Ombudsman iti uneg ti 90 nga aldaw wenno tallo a bulan nga awanan iti bayad ni Mayor Marcelo ‘Bebbot’ dela Cruz Jr. ti Rizal, Kalinga kalpasan a naduktalan a guilty daytoy iti simple misconduct.
Nailanad iti desisyon nga inaprobaran ni Ombudsman Conchita Carpio-Morales nga adda ti basaran ti reklamo nga impila dagiti lima a konsehal kontra iti mayor mainaig iti biddut a panangbusbos daytoy iti pondo ti munisipyo.
Kinuna ti Ombudsman a pinaneknekan dagiti rekord nga impalubos ni Dela Cruz ti panakaipaluspos ti pondo manipud iti savings ti munisipyo idi 2014 para iti cash gift ken insentibo dagiti municipal casual employees, barangay officials, barangay tanods, barangay health workers, day care workers ken barangay nutrition scholars.
Nupay kasta, ti nasao nga item ket saan a karaman iti naaprobaran a municipal budget idi 2014 a pakailatangan ti naaramat a pondo.
Gapu iti daytoy, linabsing ti mayor ti RA 7160 wenno ti Local Government Code of the Philippines.
