BAGUIO CITY – Nainget pay laeng ti imbestigasyon nga ipatpatungpal ti La Trinidad PNP iti panaka-hold-up ti nasurok 1.7 million pesos a kuarta iti opisina ti transport organization sadiay Buyagan La Trinidad, Benguet itay kanikadua.
Sigun kenni Police Chief Inspector Benson Macliing, dadaulo ti La trinidad PNP, karaman kadagiti suksukimaten dagitoy ti posible nga inside job.
Maipalagip nga idi alas dies y media idi Huebes, sinerrek dagiti dua a nakamaskara a lallaki ti opisina ti Buyagan Operators and drivers association wenno BODA ket inrakedda ti guardiya daytoy a ni Michael Gorio.
Malaksid a pinosasanda ti ima ti guardiya, intalida pay ti saka daytoy ken binaredbedanda iti packaging tape ti mata ken rupana.
Innala dagiti suspek ti tulbek iti guardiya a pinanglukatda iti maikadua a kadsaaran ti pasdek sakbay a puersado a linukatanda ti dua a vaults a nakaikargaan ti nasao a gatad.
Karaman pay nga innala dagiti suspek ti CCTV monitor ken ti memory card daytoy.
Sakbay a naglibas dagiti suspek ket imbalunetda ti main door ken ti gate, ken inalada ti tulbek.
Nupay kasta, nakaala met dagiti pulis iti uppat a latent print iti nasao nga opisina a maaramat iti imbestigasyon.
