BAGUIO CITY – Nakemmeg ti maysa a babae a miyembro ti rebelde a New People’s Army (NPA) kalpasan ti panakirinnupakda kadagiti militar sadiay Boliney, Abra idi malem ti Sabado.
Binigbig ni Lt. Col. Thomas Dominic Baluga, commanding officer ti 24th Infantry Battalion ti Philippine Army ti nasao a rebelde iti nagan a ‘Joana’.
Kinunana a nadangran ti nasao a babae iti rinnupak iti nagbaetan dagiti soldado ken ti grupo ti agarup 30 a rebelde sadiay Sitio Tinalban, Barangay Kilong-olao.
Dinakamatna a nakaengkwentro dagiti soldado dagiti nasao a rebelde bayat ti combat security operation iti nasao a lugar.
Nakarekoberda pay iti tallo nga M16 rifles, dua nga M14 rifles, maysa nga M203 grenade launcher, sangapulo ket lima a backpacks, dua a hand-held radios ken walo a cellular phones.
Manarimaan met ti pursuit operations kontra kadagiti nasao a rebelde.
