--Ads--

BAGUIO CITY-Sumangsango iti nagtutuon a kaso ti indibidual a nangimaneho iti Tamaraw FX a nangdungpar iti maysa a motorsiklo a nakatayan ti maysa ken nakadangran dagiti dua a riders daytoy sadiay Magmagaling, Baculongan Norte, Buguias, Benguet idi kalman.
Nupay kasta, nagkedked ti Buguias PNP a mangbigbig iti nasao nga indibidual bayat a manarimaan iti imbestigasyon iti kaso.
Naamuan a sumangsango ti nasao a suspek kadagiti kaso a maysa a reckless imprudence resulting to homicide, dua a reckless imprudence resulting to serious physical injuries, maysa a reckless imprudence resulting to damage to property ken carnapping.
Sigun iti Buguias PNP, ti nasao nga FX ket na-carnap gaputa imparada daytoy ti agtagikua a ni Efren Dawagui ngem killaat a nagpukaw wenno natakaw.
Immuna metten a nabigbig ti pimmusay a ni David Cunay, adda iti legal nga edad bayat a dagiti nadangran ket da Allan Dagines ken Franklin Bulosan.
Maibasar iti report, daldalyasaten ti motorsiklo a nagluganan dagiti tallo ti Buguias-Kabayan Road idi killaat nga inagaw ti FX ti linya dagitoy a nangitunda iti panangdungparna iti nasao a motorsiklo.
Dagus a naitaray iti pagagasan dagiti biktima ngem naideklara a dead on arrival ni Cunay bayat a nakaro ti dunor da Dagines ken Bulosan nupay addadan iti natalged a kasasaaad