4 a soldado a nadangran iti rinnupak sadiay Kalinga, naipaayan ti medalya
BAGNaipaayan iti Medalya ng Sugatang Magiting na Kawal wenno Wounded Personnel Medal dagiti uppat a soldado ti 5th Infantry Division (ID) bayat nga adda agpapaimbag dagitoy iti Camp Melchor F Dela Cruz Station Hospital sadiay Isabela.
Mismo a ni MGen. Paul Atal, commander ti 5th ID ti nangipaay iti medalya, groceries ken P5,000 a financial assistance iti tunggal maysa kadagiti nasao a soldado.
Naipaay dagiti nasao a medalya kada Sergeant Joselito Felipe manipud Isabela; Private First Class John Cris Dangatag manipud Kalinga; Private First Class Richard Panga-or manipud Mt. Province kenni Private Henry Camatcho manipud Isabela.
Binigbig ken dinayaw ni MGen. Atal ti kinatured nga impakita dagiti uppat ken dagiti kakadua dagitoy iti panangisayangkatda ti operasyon kontra kadagiti rebelde a grupo.
Maipalagip a nadangran dagiti uppat kalpasan a nakarinnupak ti 50th Infantry Battalion dagiti nasurok 20 a miyembro ti New People’s Army sadiay Balatoc, Pasil, Kalinga idi July 4.
Agingga ita ket agtultuloy ti maisaysayangkat nga operasyon tapnu makemmeg dagiti naglibas a kameng ti NPA.-gb
