BAGUIO CITY – Nakemmeg ti maysa a lalaki kalpasan a naaktuan ti panangtakawna iti koleksyon ti maysa a driver ti parapasahero a jeep sadiay Jose Abad Santos Drive, siudad ti Baguio idi kalman.
Nabigbig ti suspek a ni Alvin Agustin, 26-anyos bayat a ti biktima ket ni Erwin Bungas, 38-anyos, driver ken residente ti Bakakeng Norte, Baguio City.
Maibasar iti report, imparada ti biktima ti luganna tapnu digusenna ti anakna iti mabaybayadan a comfort room.
Nupay kasta, idi nagsubli dagitoy ket naaktuan ti biktima nga adda ti suspek iti sangwanan ti lugan ken al-alaen daytoy ti koleksyonna.
Ginandat ti suspek a tumaray kagiddan ti panangipurwakna iti P70 a koleksyon ti biktima ngem nakemmeg metlaeng daytoy ti guwardia a naka-duty iti maysa a pasdek sadiay.
Naiturong ti suspek iti Baguio City Police Office Station 7 para iti panakaipila ti reklamo kontra kenkuana.
