Balligi a sinnerek ti operatiba ti maysa a drug den idiay Purok 7, Sunny Side, Barangay Fairview, Baguio City ita a rabii iti impatungpalda a drug buy-bust operation. Ti nasao nga operasyon ket nagresulta ti pannakatiliw ti innem nga indibidual nga agpapada a High Value Target.
Dagiti suspek ket nabigbig kas 45-anyos a lalake a.k.a Carding, residente iti Barangay Fairview, Baguio City; 33-anyos a babae, residente ti Upper Quezon Hill, Baguio City; 31- anyos a babae residente ti Upper Pinget, Baguio City; 52-anyos a babae residente ti Baritao, Manaoag, Pangasinan; 30-anyos a lalake residente ti Tubao, La Union ken 34-anyos a lalake residente ti Aparri, Cagayan.
Nakumpiska manipud kadagiti suspek ti sangapulo ket innem (16) a piraso ti heat-sealed transparent plastic sachet a naglaon ti maatap a shabu no sadinno maysa a piraso ti subject of sale. Dumanon iti agarup 11 a gramo ti nakumiska manipud kadagiti suspek nga addaan iti Standard Drug Price a dumanon iti P74,800.00.
Malaksid iti dayta, nakumpiska metlaeng manipud kadagiti suspek ti sumagmamano a non-drug evidence kas iti tallo a piraso iti One-Thousand Peso a bukbuklen iti maysa(1) a piraso ti genuine, maysa (1) a piraso ti thousand peso bill ken dua (2) a piraso ti peke a one thousand peso bill (buy-bust money).
Naala metlaeng dagiti otoridad ti kinse (15) a piraso ti assorted lighters, digital weighing scale, Butane, blowtorch; rolled aluminum foil; Cigarette Marlboro Box a naka-ikabilan ti sumagmamano nga illegal a droga; Identification Card; smart cellular phone;metallic scissor; dua a piraso ti Aluminum foils; lima a naaramat nga aluminum foils; headless lighter iti aluminum foil tube; ken pito a piraso ti nalulukatan a transparent plastic sachets.
Amin dagiti suspek ket sumango ti kaso a panaglabsing ti Section 5, 6, 7 11, 12 & 15 Article II iti RA 9165 wenno Comprehensive Dangerous Durgs Act of 2002. Balligi ti operasyon babaen ti panangidaulo ti PDEA CAR Baguio Benguet Provincial Office a sinuportaran ti PDEA RO – CAR RSET ALPHA; PDEA RO – CAR LTIU; Baguio City Police Office CDEU ken Baguio City Police Office Police Station 1.
Kabayatanna, iti initial nga impormasyon a nakalap ti Bombo Newsteam Team tallo kadagiti nakemmeg ket sigud a natiliw iti kaso nga adda pakainaiganna metlaeng ti illegal a droga. //via Bombo Noveh Organo
