BAGUIO CITY – Tarigagay ti hepe ti La Trinidad Municipal Police Station a maaprobaranen iti Sangguniang Bayan ti munisipyo ti ordinansa a mangdusa kadagiti indibidual a mangar-aramid laeng iti saan a pudno a damag.
Sigun kenni PCI Benson Macli-ing, maysa a babae a residente ti Barangay Poblacion ti nagreport iti kwerpoda a natakawan iti P350,000 a kwarta malaksid pay a kinunana a nabagsol daytoy iti sidewalk a paturong sadiay Trading Post idi kalman ti agsapa.
Maisabar iti report ti babae, magmagna daytoy idi maysa kadagiti dua a suspek a mangsursurot kenkuana ti killaat a nangappot iti ngiwatna ken nangbagsol iti kanigid nga abaga ken iti maysa nga imana bayat nga inguyod ti maikadua a suspek ti shoulder bag daytoy.
Dinakamat pay ti babae a saan daytoy a nakakiddaw ti tulong kabayatan ti insidente.
Nupay kasta, iti follow-up investigation dagiti pulis ket naduktalan nga awan ti napasamak nga aniaman nga insidente iti nasao a disso ken agar-aramid laeng iti istorya ti nasao a babae ken naduktalanda nga awan ti kuarta nga iggem ti babae.
Dinakamat ti hepe a napukaw wenno nagastos ti nasao a babae ti kuarta ken urnong dagitoy isut gapuna a nagaramid iti saan a pudno a damag.
Gapu iti daytoy, inyapela manen ni Macli-ing ti saan a panagaramid dagiti umili iti parbo nga istorya wenno kaso para laeng iti personal nga interes dagitoy gaputa dagitoy ti mangipapaay iti amak kadagiti dadduma nga umili nangruna iti benneg ti seguridad nga ipatpatungpal dagiti pulis.
