BAGUIO CITY – Mangisayangkat iti Fun Run ti nagduduma a media outlet tapnu makaur-or iti pondo a maipaay kadagiti biktima ti agtultuloy a krisis sadiay Marawi City.
Sigun kenni Rosario Alberto, ti race director ti ‘Takbo Para Sa Marawi Fun Run,’ maisayangkat ti aktibidad inton Sabado, iti alas otso agingga alas dies ti agsapa.
Gapu iti daytoy ket mairikep ti Lake Drive ken Rose Garden manipud alas sais agingga alas dies ti agsapa.
Kinunana a saan nga ordinaryo ti nasao a Fun Run gaputa adda pay dagiti obstacle course a nasken a dalanan dagiti runners sakbay dagitoy a malpas.
Panggepda a makaguyugoy iti 100 nga outside runners bayat a manamnama a dumanon iti 600 ti media congress delegate.
Maitunos ti aktibidad iti pammilin ni Mayor Mauricio Domogan idi May 22 ti agdama a tawen a mangidekdeklara ita a lawas kas Media Congress Week.
Naituding a P300 ti bayadan dagiti non-media delegates bayat a P600 kadagiti media delegates.
