BAGUIO CITY – Bangkayen a nasarakan ti Grade 12 student nga immunan a naipadamag a mapukpukaw ditoy siudad ti Baguio.
Nabigbig daytoy a ni Vaughn Carl Dicang, 17-anyos, Grade 12 iti University of Baguio ken residente ti Lower Quirino Hill, Baguio City.
Iti panakiuman ti Bombo Radyo kenni PCI Denver De Guzman, hepe ti Baguio City Police Office Station 10, kinunana a nakaawatda iti report manipud iti Tactical Operations Center ti BCPO seknan iti nasarakan a bangkay iti waig iti nagbaetan ti Balacbac ken Bakakeng.
Dagus a nagrespondeda iti nasao a lugar ken positibo a binigbig dagiti kakabagianna ti bangkay ti biktima.
Kinuna ni PCI De Guzman a duwa nga anggulo ti kitkitaenda iti nasao nga insidente nupay nagkedked daytoy a mangipaay iti kanayunan a detalye nangruna ta saanda pay a maibaga ti rason ti panakatay ti biktima gaputa marunrunoten ti bangkay daytoy.
Dinakamatna a kiniddaw metten ti pamilya ti biktima a maipasidong iti otopsiya ti bangkay daytoy ngem urayenda pay ti doktor manipud iti PNP crime lab a mang-facilitate iti daytoy.
Maipalagip nga immunan nga inkamang ni Punong Barangay Van Dicang iti Bombo Radyo ti panagpukaw ti kabsatna a ni Vaughn Carl Dicang idi pay Setyembre 1 ti agdama a tawen.
