BAGUIO CITY – Agpapaimbag iti ospital ti maysa a balasitang kalpasan a pinaltogan daytoy ti saan pay a nabigbig a suspek sadiay Atok Trail, Baguio City idi kalman.
Ti biktima ket agtawen iti sangapulo ket uppat, estudyante, ken residente iti nasao a lugar.
Maibasar iti salaysay ti biktima, kinunana a simrek daytoy iti rest room iti ruar ti balay dagitoy idi nangegna nga adda ti agkarapagna a pauli ken pababa iti balay dagitoy.
Idi rimuar iti rest room ket killaat a pinaltogan ti suspek ti tiyan daytoy sakbay a naglibas bayat nga intaray dagiti kakabagianna ti biktima iti ospital.
Kinuna met ti biktima a saanna a nalasin ti suspek gaputa nasipnget iti nakapasamakan ti insidente.
Kabayatanna, iti panangiproseso ti pulisya iti crime scene ket nakaalada iti maysa a basyo ken buli ti maatap a caliber 22 a paltog.
Iti agdama ket kitkitaen dagiti pulis nu adda ti CCTV camera a nakamuntar kadagiti asideg a balay iti nakapasamakan ti insidente para iti posible a panakabigbig ti suspek.
