BAGUIO CITY – Inreklamo ti maysa nga ina ti kadendenna daytoy a laborer kasaruno ti panangabuso daytoy kenkuana.
Ti nagreklamo ket agtawen iti tallopulo ket uppat, bayat a ti suspek ket agtawen iti tallopulo ket innem, agpada dagitoy a residente ti siudad ti Baguio.
Maibasar iti report ti pulisya, nagawid ti suspek a nakainom iti arak ken sinaludsodna nu ayan ti tugawan a ginatangna para iti anak dagitoy.
Dinamag ti biktima nu apay, ken dita a nakaunget ti suspek ket sinipatna ti biktima sakbay nga impungot ken ingguyodna a paturong iti siled dagitoy.
Impaiddana ti biktima iti katri sakbay a pinarabawanna ken binekkelna sakbay a sinipatsipatna manen.
Nakaruk-at ti biktima ken ginandatna ti rumuar ngem ingguyod ti suspek ti buokna sakbay a pinaiddana manen iti kama, binekkel ken sinipatsipatna manen.
Ingkagumaan ti biktima ti timmakder ngem sinipat manen daytoy ti suspek agingga a natumba ken naitupak ti ulona iti sementado a pader.
Nagpangta ti suspek nga ipanawna ti anak dagitoy nu pumanaw ti biktima, ngem idi nakakita iti gundaway ket nagpulong ti biktima iti kuerpo ti pulisya.
Ti reklamo ket maipaspasidong iti inquest proceedings iti korte.
