BAGUIO CITY – Maipatungpal ti bus ken truck ban iti deppaar ti Quirino Highway wenno iti Naguilian Road mangrugi iti alas singko ti parbangon ti Nobyembre 1 agingga iti alas dose ti tengngat rabii.
Sigun kenni PCI Oliver Panabang, dadaulo ti Traffic Enforcement Unit ti Baguio City Police Office, maipatungpal ti bus ken truck ban manipud Buhagan Road agingga iti junction ti Irisan-Circumferential Road iti Muñoz Street.
Inlawlawagna a dagiti motorista nga agtaud iti La Union ket nasken a dumalan iti Marcos Highway no agturongda iti Baguio Central Business District bayat a nu agturongda sadiay La Trinidad ket magnada iti Longlong Road.
Kabayatanna, mangrugi iti alas singko ti parbangon ket agbalin a one-way manipud iti ayan ti traffic light iti Bokawkan-Naguilian Road agingga iti paserrek iti Dominican Road.
Kinunana a ti loading ken unloading zone dagiti agturong iti Baguio City Public Cemetery ket iti batog ti Recoletos Seminary.
Kalpasan daytoy ket bumaba ti jeep iti San Luis, magna iti San Roque ken rumuar iti Dominican area sakbay a bumaba iti Queen of Apostle Road pasubli iti Central Business District.
Inlawlawagna pay nga adda dagiti lugan a mabalin a sumrek iti kadakkelan a sementeryo ti siudad ngem dagitoy ket nasken nga agala iti car pass sadiay City Hall.
Binalakadanna dagiti addaan iti lugan a magmagnada laengen nu agturongda kadagiti sementeryo tapnu saanda a marigatan.
Kinunana met a mangikabilda iti traffic signages kadagiti paset dagiti kalsada iti siudad a pakaipatungpalan ti traffic rerouting scheme.
