BAGUIO CITY – An-anopen ita ti Buguias PNP ti mapapati a suspek iti ipupusay ti maysa a lalaki iti napasamak a vehicular accident sadiay Sinipsip, Amgaleyguey, Bugias, Benguet idi rabii kalman.
Nabigbig ti biktima a ni Kenny Bumang-at, 23-anyos, laborer ken tubo ti Hungduan, Ifugao bayat a ti suspek ket nabigbig a ni Richard Mukati a tubo ti Tinoc, Ifugao.
Sigun kenni PCI Ceasar Sab-it, dadaulo ti Bugias PNP, naduktalan iti imbestigasyonda a naka-angkas laeng ti biktima iti motorsiklo ti suspek ken nag-overtake ti driver iti sarsarnuwenda nga elf truck.
Nupay kasta, kinuna ti driver ti nasao nga elf truck ket nakangngeg laeng dagitoy iti panakatumba ti motorsiko ken nakitada ti panagtaray ti driver ti motorsiklo.
Kinuna ni PCI Sab-it nga im-imbestigaranda met no possible a ‘self-inflicted accident’ ti napasamak ken imbati laeng ti driver ti kadwana a pimmusay.
Dagus met a naiturong ti biktima iti pagagasan ngem naideklara a dead on arrival babaen iti attending physician gapu iti nakaro a donor iti ulo daytoy.
Naamuan nga adda paylaeng iti morgue ti pagagasan ti bangkay ti biktima.
