BAGUIO CITY – Nadangran ti maysa a mannursuro kalpasan a natamaan iti troso ti lugan dagitoy a dumaldalyasat iti national highway sadiay Anew, Anabel, Sadanga idi kanikadua.
Nabigbig daytoy a ni Charmie Grace Bilagot Loton, 30-anyos, balasang, mannursuro ken residente ti Bulanao, Tabuk, Kalinga.
Maibasar iti report, manarimaan ti panagdalyasat ti parapasahero a van nga imanmaneho ni Jorge Edades iti nasao a kalsada paturong sadiay Vigan, Ilocos Sur idi saanna a nakita ti panangpasardeng kenkuana ti maysa a lalaki nga adda iti igid ti kalsada.
Naklaat laengen ti nasao a driver gaputa killaat a timmama iti luganna ti maysa a troso a natnag manipud iti ngato ti bantay.
Nadadael ti maysa a tawa ti nasao a van ken nadangran ti maysa kadagiti pasahero daytoy a ni Loton.
Dagus a naitaray iti Bontoc General Hospital ti biktima ngem naiyakar iti Baguio General Hospital.
Naiturong met iti kwerpo ti pulisya dagiti dua a maseknan wenno responsable iti panakatnag ti troso.
Nabigbig dagitoy a da Lorenzo Lawingan Lamog, 32-anyos ken Josua Pil-ey Sarang-ey, 25-anyos, agpada a laborer ken residente ti Anabel, Sadanga, Mt. Province.
