BAGUIO CITY – Impaulogen ni Mayor Maurico Domogan ti executive order para iti panakabukel ti task force a mangadal iti maisaksakad a panagtitipon dagiti 128 a babbarangay ti siudad ti Baguio.
Sigun kenni ABC president Michael Lawana, ti nasao a task force ket buklen ti 10 a Board of Directors manipud iti liga dagiti babbarangay, panakabagi ti City Planning Office, City Budget Office ken ti Assessor’s Office.
Kinunana nga idi napalabas a tawen dumanon iti uppat agingga lima a daras ti naisayangkat a taripnong tapnu mapagsaritaan ti barangay merging ken nangbukelda iti 42 a grupo.
Nupay kasta, inaklonna nga adda dagiti sumagmamano a barangay a saanda a nangipatungpalan iti Information Education Campaign.
Gapu iti daytoy, nabilin dagiti maseknan nga opisial ti babbarangay a dagitoy ti mangipakaawat kadagiti bumaranggay iti nasao a panggep.
Innayon ti konsehal nga ita a tawen ket buklenda ti pinal a plano a maisumitir iti lokal a konseho sakbay a maiturong iti Kongreso.
