Opisyalen a nangipila iti affidavit ti abogado ni Vice President Sara Duterte idiay National Bureau of Investigation (NBI) seknan kadagiti alegasyon ti sigud a pulis a ni Rodulfo Gracioso Jr. a maatap a panangitulodna kadagiti maleta a naglaon iti kuwarta iti pamilya Duterte.
Sigun kenni Gracioso, sigud a paset tii security detail ni sigud a House Speaker Lord Allan Velasco, nangitulod daytoy kadagiti maleta a naglaon iti kuwarta kenni Vice President Sara Duterte, sigud a President Rodrigo Duterte, ken Davao City 1st District Representative Paolo “Pulong” Duterte kas inbilin kenkuana ni Velasco.
Mapatta-patta a dumanon iti agarup P2 Bilyon ti maatap a pakabuklan a gatad ti kuwarta ng intulod ni Gracioso kenni VP Sara.
Nainget met a pinaglibakan ti bise presidente dagiti nasao nga alegasyon.
Saanen daytoy a personal a dimmar-ay idiay NBI ken dagiti laeng abogadona ti nagturong iti nasao nga opisina tapno mangisumitir iti affidavit.
Sigun kenni Atty Clifford Chua, saan a kasapulan a personal nga agturong ti bise presidente iti nasao nga opisina kagidan iti panangipettengna nga ulbod amin dagiti alegasyon ni Gracioso.
Karaman metten iti affidavit nga insumitirda dagiti ladawan nga immunan nga inparang ni VP Sara iti press conference daytoy itay nabiit.
