BAGUIO CITY – Naipaulog ti subpeona para kadagiti 16 nga indibidual a maatap nga iligal nga agminmina sadiay Wabac, Camp 7, Kennon Road, siudad ti Baguio.
Sigun kenni PCI Francisco Cacas, station commander ti Station 8 ti Baguio City Police Office (BCPO), nagtaud ti nasao a subpoena iti Mines and Geosciences Bureau (MGB).
Kinunana a natakwatanda nga agtultuloy ti operasyon dagiti minero iti nasao a lugar ken maibasar iti report a naipadpadanun kadakuada ket rabii ken parbangon ti operasyon dagiti nasao nga indibidual.
Maipalagip nga impaulog ni Mayor Mauricio Domogan ti pammilin para iti naan-anay a panakaipawil ti aniaman a panagminas ditoy siudad ti Baguio.
Nainget met ti agtultuloy a panagbantay ti BCPO – Station 8 kadagiti dadduma pay a maatap a mining areas iti masakupanda tapnu dagus a maipasardeng no adda man ti iligal a panagminas kadagitoy.
