BAGUIO CITY–Tinawen a laglagipen ti Pamilya Danao ti ipupusay ti banuar a kameng ti pamilyada a daydi PO3 Walner Danao a maysa iti SAF44.
Iti panakiyuman ti Bombo Radyo kenni Dexter Danao, kinunana nga agingga ita ket hustisya ti kiddawda iti napasamak iti kakaisuna a kabsatna.
Kinunana a gapu iti daytoy ket ituloyda latta ti kaso kontra kadagiti responsable iti napasamak iti SAF44.
Inaklonna a no saanna a makitkita ti ladawan ni adingna ket arigna malipatan ti napasamak ngem no makitana manen ti ladawan ti kabsatna ket agsubli manen sakit ti nakemna iti naaramid iti SAF44.
Kabayatanna, nagyaman met daytoy gaputa intuloy ti Duterte Administration ti panakaipaay ti tulong iti kapamilya dagiti napasag a SAF44 gaputa iti agdama ket addaan iti scholarship grant dagiti tallo nga annakna manipud iti pulisya.
Dinakamatna pay nga adda met latta ti komunikasyonna kadagiti kapamilya ti SAF44 pakairamanan ti maysa kadagiti survivor iti Mamasapano Massacre a ni PO2 Christopher Lalan.
Kabayatanna, nangisayangkat ti Pamilya Tabdi iti simple a misa para iti panakalagip ti maikatlo a tawen nga ipupusay ti anakda a banuar.
Sigun kenni Garcia Tabdi, ama daydi PCI Gednat Tabdi, mangisagotda iti kararag para iti anakda ken iti kakadua daytoy a pimmusay iti nadara nga engkwentro sadiay Mamasapano, Maguindanao.
Insayangkatda ti nasao a misa iti pagtaenganda sadiay La Trinidad, Benguet ken saandan a nagturong pay iti headquarters ti PNP-Special Action Force sadiay Taguig City.
Kabayatanna, linagip ken pinadayawan met ti Baguio City PNP ti kinabanuar dagiti SAF 44 babaen iti seremonya nga inangayda sadiay Veterans Park.
