BAGUIO CITY–manamnama a ngumato iti lima agingga sangapulo a porsiento ti presyo dagiti sabong a rosas mangrugi inton sumaruno a lawas agingga iti Pebrero 14 wenno iti Valentine’s Day.
Sigun kenni Andy Colte, presidente ti La Trinidad Cut-flower and Ornamental Growers Association, nangrugi ita nga aldaw ket ngimmato ti demand para iti rosas sadiay Manila.
Kinunana nga ita paylaeng ket adun a tawag ti naawatda manipud kadagiti buyers sadiay ken dagitoy ket nagpareserba iti sabong a rosas.
Dinakamatna nga adun a pagmulaan ti rosas sadiay La Trinidad ti nakareserba tapnu saan a mapukawan dagiti buyers iti suplay ti nasao a sabong.
Iti baet daytoy, impanamnamana nga umdas paylaeng ti suplay ti rosas sadiay nangruna ta awan ti dimmalapos iti lokalidad a napigsa a bagyo.
Kabayatanna, kinuna pay ni Colte a nakasaganada para iti Panagbenga 2018 ken addan dagiti nangkontak kadakuada manipud kadagiti agaramid kadagiti float a maisalip iti Grand Float Parade.
Dinakamatna a nakasaganan dagiti sabong a chrysanthemum, alstroemeria wenno Peruvian lily, rosas ken dagiti potted plants a kadawyan a maar-aramat a pang-arkos kadagiti floats.
