BAGUIO CITY — Nangrugin ti makabulan a panakarambak ti maika-23 nga edisyon ti Baguio Flower Festival wenno Panagbenga nga addaan iti tema a “Celebration of Culture and Creativity”.
Narugian daytoy babaen iti maysa a multi-faith prayer sadiay Panagbenga Park a sinaruno ti Grand Opening Parade idi agsapa.
Kabayatanna, bigbigbigen ni Presidente Rodrigo Duterte ti kinapateg ti turismo isut gapuna a salsaluduanna ti napateg a papel ti Panagbenga ti siudad ti Baguio a maysa kadagiti mabigbigbig a festibidad iti pagilian ken iti lubong.
Nagbalin daytoy a mensahe ni Presidente Duterte para iti siudad nga indanun met ni Presidential spokesperson Harry Roque Jr. iti panagbitlana iti panaglukat ti maika-23 nga edisyon ti Baguio Flower Festival wenno Panagbenga ita a tawen.
Kinunana a nagturong daytoy iti siudad tapnu idanun wenno ibingay dagiti napateg a sagot ti presidente, saan laeng nga iti Baguio ngem iti entero a rehion ti Cordillera.
Iti panagbitlana, dinakamatna ti panakaipaay ti libre a tuition iti amin nga state universities and colleges bayat a dandanin mapirmaan ti gakat para iti Universal Health Care a mangipaay iti libre nga agas ken panagpa-ospital.
Kinunana nga ipangruna met ti gobyerno dagiti mannalon iti Cordillera babaen iti panakaipaay ti libre a padanum wenno irigasyon apaman a mapirmaan ti presidente ti gakat para iti daytoy.
Innayon ni Roque nga impasigurado ti presidente a denggen ken adalen daytoy ti tarigagay ti Cordillera nga otonomiya iti maysa a federal a republika tapnu pagnumaran met dagiti Cordillerans dagiti kinabaknang ti rehion.
