BAGUIO CITY — Dagus a pimmusay ti maysa a babai kalpasan a timpuak daytoy iti tawa ti ab-abanganda a silid iti maysa a balay sadiay Sumulong Proper, Holy Ghost Barangay, Baguio City idi malem kalman.
Nabigbig daytoy a ni Jocelyn Peralta, 41-anyos ken dishwasher iti maysa a bar ditoy siudad.
Sigun kenni PSI Julius Basinga, dadaulo ti BCPO Station 3, nagresponde dagitoy iti nasao nga insidente iti pasado alas dos ti malem.
Kinunana a maibasar iti imbestigasion daytoy, nagrugi a naginum iti arak ti biktima kadwana ti live-in partner a managan iti Ariesteo Cunanan ken ti akinkukua iti pagab-abanagan dagitoy sipod alas otso ti agsapa.
Kinunana nga ala-una iti malem idi nagsardeng dagitoy nga agin-inom ken naturog ti akinkukua iti balay.
Nupay kasta, insalaysay met ti maysa a kaarubada a boarder a nagap-apa ti dua nga aglive-in ken nakangeg daytoy iti nabettak a sarming.
Kalpasan ti sumagmamano a minutos ket nakitada ti bagi ti babai a nakadasay iti ruar a mapapati a limmagto manipod iti tawa ti kuarto dagitoy.
Iti panagresponde dagiti kameng ti pulisia ken Scene of the Crime Operatives, indeklara ti Medico Legal Officer a dead on the spot ti biktima.
Kabayatanna, nakaruar metten manipus iti istasyon ti pulisya ti live-in partner ti biktima babaen iti pammilin ti korte bayat a naiturong met iti maysa a punerya ti bangkay ti biktima.
Kinuna pay ti pulisya a saanda pay laeng a makumpirmar no pudno a timpuak iti tawa ti biktima wenno adda iti “foul play” iti nasao nga insidente.
