No plastic ordinance ti La Trinidad, Benguet, nainget a maikamkampanya
BAGUIO CITY- Nainget ita ti kampanya ti Municipal Environment and Natural Resources Office (MENRO) ti La Trinidad, Benguet seknan iti plastic ordinance ti munisipyo.
Sigun kenni Arthur Pedro, dadaulo ti MENRO – La Trinidad, babaen iti daytoy ket awanen kadagiti business establishiments ti agaramat iti plastic iti deppaar ti Kilometer 5 inton dumteng ti umuna nga aldaw ti Mayo.
Kinunana nga agiwarwarasda iti kopya ti ordinansa ken saanda met liwliwayan nga ipalpalagip kadagiti negosyante sadiay ti panagsurot dagitoy iti nasao nga ordinansa tapnu saanda a mamulta.
Kagiddan iti daytoy, insingasingna ti panagimet dagiti market goers iti bukod dagitoy nga ecobags.
Dinakamatna nga iti wet goods ket mabalin latta nga agala iti bayong wenno anyaman a container a mabalin a pangikabilanda iti gatangenda a lames wenno karne.
Mailaksid iti ordinansa dagiti wholesellers ti nateng gaputa kasapulan met nga agaramatda ti plastic.
Naituding a mamulta iti P1,000 agingga P2,500 wenno makanselar ti business permit dagiti aglabsing iti nasao nga ordinansa.
Dinakamat ni Pedro nga iti agdama ket nangrugin nga agtungpal iti ordinansa ti kadakkelan a business establishment sadiay Kilometer 4 bayat nga impanamnama dagiti dadduma pay nga establishimiento sadiay ti panakikaykaysada iti nasao a linteg.
