BAGUIO CITY — Agpatpatulong iti Sangguniang Bayan ti La Trinidad, Benguet ti Cruz-Alapang-Bahong-Alno Cooperative Operators and Drivers Association, Incorporated wenno CABACODA, Inc. tapnu maamuan ti nagturongan ti kwartada nga impaayda kadagiti personnel ti Department of Transportation (DOTr) – Cordillera para iti transport franchise application dagitoy.
Nailanad iti joint affidavit dagiti opisyales ti asosasyon nga idi April 2017 ket nabukel dagitoy ken idi June 2017 ket nakasaritada ti managan Jonathan Patnugot a driver/bodyguard ni DOTr-Cordillera Assistant Regional Director Mohammad Nasser Abbas iti Land Transportation Office sadiay Pacdal.
Kinunada a nakasaritada metlaeng ni Abbas ken dinakamat daytoy nga addan kenkuana ti certificate of registration, official receipts ken dadduma pay a dokumento nga insumitir ti asosasyon kenni Patnugot para iti transport franchise application dagitoy.
Kinunada nga impanamnama pay ni Abbas nga ipaayanna dagitoy iti prangkisa iti baet a tamaraw FX ti shuttle services ti asosasyon gaputa addaan daytoy iti bileg a mangipaay iti maap-aplikaran a prangkisa.
Dinakamat ti grupo a dagusda a nagbayad iti DOTr-Central Office babaen iti bank account a naipaay kadakuada ken iti listaanda ket 15 a miembro ti nagbayad iti sag-P10,000 bayat a 15 a miembro ti nagbayad met iti sag-P15,000.
Naduktalan ti CABACODA, Inc. a saan a pasado iti Omnibus Franchising Guidelines ti unit dagiti luganda ngem impanamnama ni Patnugot nga ipaayan ni Abbas dagitoy iti special permit isut gapuna nagbayadda manen iti P5,000 ken kanayonan a P2,000.
Nupay kasta, agingga ita ket awan ti naipapaay kadakuada nga special permit ken prangkisa isut gapuna nagkamangda iti lokal a konseho ti munisipyo para iti panakaimbestigar ti napasamak.
