BAGUIO CITY – Maangay ita nga aldaw, Abril 27 agingga inton bigat, Abril 28 ti dua nga aldaw a TienDA sa Cordillera, partikular iti Benguet Agri-Pinoy Trading Center sadiay La Trinidad, Benguet.
Sigun kenni Agriculture Secretary Emmanuel Piñol, maitampok iti nasao a TienDA dagiti lacatan a saba manipud Kidapawan City, Cotabato ken dagiti sadiwa nga ikan kas iti bangus, kitang ken danggit manipud Malalag, Davao del Sur.
Mailako metlaeng sadiay dagiti baro a kiskis a bagas manipud Central Luzon ken dadduma a produkto a saan a kadawyan a magatang ditoy highlands.
Kinunana a dagiti agriculture ken fishery products a mailako kadagiti nasao nga aldaw ket magatang iti farm gate prices wenno iti presyo manipud iti naka-angkatan dagitoy.
Sigun pay kenni Piñol, manamnama a mapasayaat pay ti agricultural ken fisheries trading iti nagbaetan ti Cordillera ken iti abagatan a paset ti Pilipinas babaen iti TienDA.
Dinakamatna a ti TienDA ket adbokasiya ti ahensia tapnu mabukel ti koneksion dagiti mannalon ken mangngalap kadagiti konsyumer dagitoy tapnu maipababa ti gatad dagiti taraon a komiditi iti merkado.
