BAGUIO CITY – Inimbitaran ti City Council ti Baguio ti Department of Science and Technology (DOST) ken ti Department of Environment and Natural Resources (DENR) tapnu agparang dagitoy iti sumaruno a sesyon ti konseho.
Iti panakiyuman ti Bombo Radyo kenni Councilor Elaine Sembrano, chair ti Committee on Health and Sanitation, Ecology and Environmental Protection, kinunana a babaen iti daytoy ket maamuanda no pudno a biodegradable dagiti plastic nga ar-aramaten dagiti sumagmamano a department stores ditoy siudad.
Kinunana a paset daytoy ti addangda kalpasan a sumagmamano a department stores ditoy siudad ti agkidkiddaw ti exemption wenno panakailaksid iti implementasyon ti Plastic and Styrofoam Free Baguio Ordinance.
Sigun kenkuana, kidkiddawen dagiti nasao a pagtagilakuan ti panakailaksidda manipud iti panagaramat iti maikalkalikagum a paper bag tapnu ti aramatenda ket biodegradable a plastic.
Impalawagna a kiddawenda ti panangsertipikar ti DOST no dagiti biodegradable a plastic dagiti nasao a pagtagilakuan ket pudno a biodegradable.
Innayonna pay nga aniaman a desisyon dagitoy ket agpannuray iti agbalin a resulta ti panangadal ti DOST kadagiti nasao a biodegradable plastics nangruna ta adda latta ti component dagitoy a plastic.
