BAGUIO CITY – Panggep ti Sangguniang Bayan ti La Trinidad, Benguet nga irebisar ti La Trinidad Vegetable Trading Post Code.
Sigun kenni Councilor Henry Kipas, chairma ti Committee on Laws, kabayatan ti panangrebisarda iti Revenue Code ti munisipyo ket adda dagiti nakitada kadagiti probisyon ti La Trinidad Vegetable Trading Post Code a nasken a mabaliwan gapu iti typographical error.
Kinunana a narebisar ti Revenue Code ti La Trinidad isut gapuna a kasapulan met a mabaliwan dagiti dadduma a probisyon ti nasao a linteg ti La Trinidad Vegetable Trading Post.
Linawlawaganna met a saan nga amin a probisyon ti nasao a linteg ket mabaliwan.
Impettengna a mangisayangkatda iti serye ti konsultasyon kadagiti maskenan nga stakeholders sadiay tapnu awan ti rumsua a parikut wenno saan a panagkinna-awatan.
Kagiddan iti daytoy, kidkiddawenna kadagiti maseknan nga stakeholders tapnu no adda ti maisayangkat a konsultasyon ket dumar-ayda tapnu awan ti rason dagitoy nga agreklamo.
Maipalagip a nabayagen a panggep ti lokal a gobyerno ti La Trinidad a marebisa ti linteg a mangi-gigiya iti panakaimaton ken operasyon ti nasao a trading post.
