BAGUIO CITY – Pinadawayan ti lokal a gobyerno ti Mt. Province ti dua nga ubbing nga estudyante ti Banga-an Elementary School sadiay Sagada gapu iti panangimbento dagitoy iti maysa a treadle glass ken bottle-crusher a dakkel a makatulong iti panakaimaton dagiti basura.
Nabigbig dagiti young inventors a da Nixon L. Labiang ken Jimber Lee A. Camareg ken naipaayan dagitoy iti Certificates of Commendation ken cash incentives a sag-P2,500.
Babaen iti nairesiklo a ball mill, inimbento ni Labiang idi adda daytoy iti Grade VI ti maysa nga improvised glass ken bottle crusher. Idi napalabas a tawen, pinasayaat ni Camareg ti imbension babaen iti panangikabitna iti bisikleta kas treadle.
Ti treadle glass ken bottle crusher entry ti Bang-an ES ti first place iti 2017 Regional Science and Math Festival – Elementary Category ti Department of Education – Cordillera.
Sigun met ti Mt. Province Provincial Environment and Natural Resources Office, kabaelan ti treadle glass ken bottle crusher a mangburbor iti medicine bottles, broken glasses ken dadduma a kita ti botelya. Kabaelan ti crusher a manggiling kadagiti botelya nga agdagsen iti agarup 2,575 a gramo.
Kinuna ti opisina a mabalin a mailaok kadagiti semento dagiti magiling a botelya.
