BAGUIO CITY – Kasapulan a mismo a dagiti transport groups iti lokalidad ti mangwanawan kadagiti miyembro dagitoy.
Sigun kenni Mayor Mauricio Domogan, babaen daytoy iti panangikalikagum dagiti transport groups iti panakaipasidong dagiti miyembro dagitoy iti drug test.
Dinakamatna nga iti report ti pulisya ket 257 a drivers iti lokalidad ti agar-aramat iti iligal a droga.
Innayonna a babaen iti drug test ket maamuan no asino dagiti drivers nga agar-aramat iti iligal a droga ken tapnu saan nga amin ket mairaman a mabigbig kas drug users.
Immuna metten a kinuna ni James Bolinao, presidente ti Dumper Philippines – Cordillera Chapter a nakasagana dagiti drivers dagiti public utility vehicles ditoy lokalidad a maipasidong iti drug test.
Nupay kasta, inyunay-unayna a nasken nga ibaklay met ti gobyerno ti mabusbos iti nasao a panagpa-drug test dagiti drivers iti lokalidad.
