BAGUIO CITY – Nakasagana dagiti drivers dagiti public utility vehicles (PUVs) ditoy lokalidad nga agpa-drug test.
Sungbatda daytoy iti kiddaw ni Mayor Mauricio Domogan a pannakabantay dagiti drivers a maatap nga addaan pakainaigan iti iligal a droga.
Sigun ken ni James Bolinao, presidente ti Dumper Philippines – Cordillera Chapter, mabalin nga agbalin a requirement dagiti drivers ti drug testing.
Nupay kasta, impettengna a ti gobyerno ti mangibaklay iti mabusbos dagitoy.
Inlawlawagna a saan a siento porsiento a mapagtalkan ti drug testing gaputa mabalin a mapeke daytoy babaen iti nagduduma a wagas.
Iti baet daytoy, kinuna ni Bolinao a nakasagana dagiti operators dagiti para publiko a luglugan a makikaykaysa iti pulisya tapno mamonitor dagiti driver a konektado iti iligal a droga ken tapno mapatawan dagitoy iti pannusa.
