BAGUIO CITY – Ad-adda a mapapintas ti kalidad dagiti produkto nga agtataud iti rehiyon Cordillera.
Sigun kenni Department of Science and Technology (DOST) Undersecretary for Regional Operations Brenda Nazareth-Manzano, babaen daytoy iti panakailukat ti baro a Food Innovation Center ti rehiyon iti lote ti Benguet State University sadiay Km. 6, La Trinidad, Benguet.
Kinunana a ti panakaipasdek ti pasilidad ket maysa a dakkel a panagdur-as iti tay-ak ti panangaramid kadagiti baro a taraon a produkto nga agtaud iti rehiyon babaen kadagiti baro a teknolohiya.
Agserbi ti center kas lugar para kadagiti inobasyon, panagsirarak ken panagimbento malaksid pay nga agserbi kas support services para iti panakapapintas dagiti sadiwa a produkto ken iti panakaiproseso dagitoy.
Dinakamat ni Manzado nga iti panakibinnadang ti ahensia kadagiti nagduduma nga state college and universities ket nakaipasdekdan iti 18 nga Food Innovation Centers iti nagduduma a paset ti pagilian ken nasurok 2,000 a baro a produkto ti napataud dagitoy.
