BAGUIO CITY – Impannakkel ti Cordillera PNP ti panakakemmeg ti dumanon iti 26 a wanted persons iti rehiyon, pakairamanan ti No. 8 Top Most Wanted Person ti Cordillera iti agtultuloy nga anti-criminality operations ti pulisya.
Sigun iti Cordillera PNP, kinnemmeg dagiti operatiba ti Asipulo Municipal Police Station ti No. 8 Top Most Wanted Person ti Cordillera iti umuna a kwarter ti 2018 a nabigbig a ni Pablo Bangad, 35-anyos, baro, mannalon ken residente ti Bato Cawayan, Asipulo, Ifugao.
Nakemmeg ti nasao nga indibidual gapu iti kaso daytoy a panagrames nga awan iti nairekomendar a piyansana.
Kabayatanna, nakemmeg met laeng ti No. 2 Top Most Wanted Person iti Provincial Level ti Kalinga a nabigbig a ni Ramon Balunggay Wingnga, 51-anyos, naasawaan, mannalon ken residente ti Maledda, Ipil, Tabuk City a sumangsango iti kaso a murder wenno pammapatay.
Balligi pay a nakemmeg dagiti 24 a dadduma pay a wanted persons iti Cordillera a sumangsango iti nagduduma a kaso.
Gapu iti naaramidan dagiti pulis ti rehiyon, dinayaw ni Cordillera PNP Regional Director ti PCSupt. Edward Carranza ti dedikasion ken naaramidan dagiti pulis ti rehiyon iti panangkemmegda kadagiti indibidual nga aglemlemmeng iti linteg.
