BAGUIO CITY – Guyguyuguyen manen ti Department of Transportation (DOTr) – Cordillera dagiti amin a maseknan nga umili tapnu dumar-ayda iti naituding a public hearing ita nga aldaw, May 15 iti kiddaw a panakaipangato ti plete kadagiti pasapasahero a jeep iti Baguio-La Trinidad-Itogon-Sablan-Tuba-Tublay (BLISTT) Area.
Immuna iti daytoy, kiniddaw ti Alliance of Jeepney Operators and Drivers Associations in BLISTT ti panakaipangato ti plete kadagiti parapasahero a jeep iti dumanon P14 para iti umuna nga uppat a kilometro ken kanayonan a P2 iti tunggal sumaruno a kilometro.
Sigun kenni DOTr-Cordillera regional director Atty. Jose Eduardo Natividad, babaen iti idadar-ay ti publiko ket direkta a maipeksada dagiti pakaseknanda ken dagiti isyu dagitoy iti sangwanan dagiti opisyal ti Land Transportation Franchising Regulatory Board (LTFRB).
Innayonna a ti akem ti LTFRB-Cordillera ket ti mang-urnong iti resulta ti konsultasyon ti publiko ken maiparang daytoy iti maseknan nga opisina para iti panakairekomendarna iti Board para iti kanayonan a delibirasyon ken kaskenan nga aksion.
Inyunay-unayna pay nga agrekomendar laeng ti LTFRB-Cordillera bayat a ti desisyon no mapatgan ti kiddaw wenno saan ket nakadepende iti LTFRB.
Maipalagip a ti agdama a plete kadagiti parapasahero a jeep ket P8.50 para iti umuna nga uppat a kilometro ken kanayonan a P1.40 iti tunggal kilometro.
Maangay ti public hearing iti opisina ti LTFRB-Cordillera sadiay Pacdal, siudad ti Baguio.
