BAGUIO CITY – Sukimaten ti Department of Public Works and Highways – Cordillera, ti kontraktor iti rehabilitasyon ti Baguio Convention Center ken ti City Buildings and Architecture Office iti aglawlaw ti nasoa a pasilidad inton sumaruno a Lunes.
Sigun kenni City Mayor Mauricio Domogan, babaen daytoy ket maamuan ti structural stability wenno ti kinatibker ti pasdek kagiddan ti maipatpatungpal sadiay nga underground treasure hunting activity.
Kinunana a saan a kaskarina a maipasardeng ti treasure hunting activity sadiay nangruna ta adda ti naala ni treasure hunter Eliseo Cabusao Jr. a pammalubos manipud iti nasyonal a gobyerno babaen iti national museum.
Nupay kasta, kinunana a rumbeng a sungbatan ni Cabusao ti sumagmamano a saludsod mainaig iti ipatpatungpalda a treasure hunting activity.
Dinakamatna a karaman ditoy ti pakaseknan no apektaran ti aktibidad ti kinatibker ti pasdek, no anya ti aramidenda tapnu maisubli ti sigud nga structural stability ti Convention Center ken ti timetable tapnu malpas ti aktibidad nangruna ta maipatungpal metten ti rehabilitasyon ti pasilidad.
Innayon ti mayor nga iti kanito nga adda ti masarakan a treasure wenno gameng iti nasao a lugar ket makaawat ti lokal a gobyerno iti 35 percent a bingay kas maibasar iti baro a linteg.
