BAGUIO CITY – Pormalen a kinasuan ti Office of the Provincial Prosecutor ti Benguet ti maysa a hiker manipud Cebu gapu iti panakadadael ti paset ti Mt. Pulag National Park gapu iti uram nga intunda ti bimtak a butane gas, tallo a bulan ti napalabas.
Sumangsango ita ni Raymon Kristomar Mackay iti kaso a panaglabsing iti Section 78 ti PD 705 wenno ti Forestry Reform Code of the Philippines bayat a napaawan-basol ti innem a kakadua daytoy ken ti tour guide dagitoy.
Nailanad pay iti resolusyon nga inruar ti Benguet Provincial Prosecutor a mamulta ni Mackay iti dumanon P2.36-M malaksid pay iti panakaibaludna iti saan a bumaba iti 6 a bulan agingga nasurok 2 a tawen kas maitunos iti linteg.
Maipalagip nga alas tres iti malem ti Enero 20 idi nauram ti agarup 23,600 metro kwadrado a grassland ti nalatak a Mount Pulag kalpasan nga imbarsak ni Mackay iti ayan dagiti ruot ti bimtak a kalan dagitoy.
Nangitunda ti uram iti dadael iti nasao a bantay nga aggatad ti dumanon P2.36-M.
Nailanad pay iti resolusyon a ti panagbaybay-an ni Mackay ti nagresulta iti panakadadael ti nasao a paset ti Mt. Pulag, partikular ti panakairikep ti Akiki-Tawangan Trail ken ti summit ti bantay.
