BAGUIO CITY – Nabigbig ti probinsia ti Kalinga a maaw-awagan a ‘rice granary of the North’ kas maikapito a rice producers ditoy pagilian babaen iti Rice Achiever’s Awards (RAA) ti Department of Agriculture (DA).
Sigun iti DA ti Rice Achiever’s Awards ket programa ti gobyerno a mangpadpadayaw kadagiti probinsia, munisipyo, siudad ken agricultural extension workers gapu iti naisangsangayan a kontribusyon dagitoy iti produksion ti bagas ken iti food self-sufficiency program ti pagilian.
Naamuan nga idi napalabas a tawen ket nakaipaay ti Kalinga iti nasurok 173,000 metric tons iti suplay ti bagas iti pagilian.
Limmawa pay dagiti talon a namulaan ti pagay sadiay Kalinga a dimmanon iti agarup 36,000 nga ektarya manipud iti nasurok 33,000 nga ektarya idi 2016.
Nakailista met ti probinsia iti 247 percent a self-sufficiency iti produksion ti bagas idi 2017 a rason tapnu mabigbig daytoy kas ‘top rice producer ken trader’ ti bagas ditoy rehion.
Nagbalin a posible ti nadur-as a produksion ti bagas sadiay Kalinga babaen iti panagaramat dagiti mannalon kadagiti kabaruan a teknolohiya iti panagmula ti pagay.
Sigun kenni Kalinga Provincial Agriculturist Domingo Bakilan, karaman pay ditoy ti napintas a panangakseptar dagiti mannalon ti pagay kadagiti teknolohiya a maipapaay kadagitoy malaksid pay iti rehabilitasyon dagiti irrigation systems sadiay a nangitunda iti panaglawa dagiti talon ti pagay.
Gapu iti panakabigbig ti Kalinga, makaawat da iti P4-M nga insentibo a maipaay babaen kadagiti rice-related projects.
Kabayatanna, mabigbig met ni Bakilan kas maysa kadagiti Outstanding Agricultural Extension Workers iti pagilian ita a tawen.
Maangay ti awarding ceremony inton Mayo 31 sadiay Pasay City.
