BAGUIO CITY – Immapela ti Benguet Corporation (BC) iti National Task Force Mining Challenge (NTFMC) para iti dagus a panakaipasardeng ti iligal nga operasyon ti dagiti small scale miners iti kukua ti BC a mineral properties sadiay Acupan, Gumatdang ken Antamok sadiay Itogon, Benguet.
Nailanad iti surat ni BC president Leopoldo Sison III iti nasao a task force nga awan ti umno a pasilidad dagiti minero para kadagiti mine wastes, tailings ken kemikal manipud iti operasionda a mangap-apektar iti infrastructure facilities ti kompanya.
Gapu iti daytoy, kidkiddawenda ti panakaipasardeng ti operasion dagiti small scale miners sadiay tapnu maliklikan pay ti dakdakes nga epekto ti operasion dagitoy.
Insingasing ti kompanya a mabalin met nga umakar dagiti apektado a minero iti maisaksakad a Minahang Bayan tapnu mabantayan ti operasion dagitoy.
Kagiddan iti daytoy, nangipatungpal iti field validation ti Provincial Mining and Regulatory Board kadagiti lima a disso a posible a maideklara a Minahang Bayan sadiay Itogon kas sadiay Barangay Ampucao, Gumatdang, Loacan, Poblacion, Tuding, Ucab ken Virac a pagminminasan ti 39 nga asosasyon.
