BAGUIO CITY – Im-imbestigaran ti pulisya ti panakatay ti maysa a barito kalpasan a timpuak iti Burnham Lake, ditoy siudad ti Baguio idi kanikadua.
Nabigbig ti pimmusay a ni Lharz Louvic Bayawoc Wanna, 16-anyos ken residente ti Kias, Baguio City.
Sigun kenni PCI Marlo Evasco, station commander ti Baguio City Police Office – Station 7, napasamak ti nasao nga insidente iti tengngat rabii nga naimatangan ti maysa a paris ti aggayem a nakatugaw iti igid ti Burnham Lake.
Kinunana a tinulungan pay ti aggayyem ti nasao a barito ngem naglangoy daytoy a paadayo agingga a nalmes.
Dagus met a nagresponde ni SPO4 Miguel Gayaden ti Tourist Police Unit a nangisalakan iti barito ken inturongda daytoy iti pagagasan,
Nupay kasta, pimmusay met laeng ti barito iti alas singko ti agsapa.
Iti met panaki-uman ti pulisya iti kabsat ti biktima, kinunana nga adda iti nangsukon iti kabsatna sakbay a napasamak ti insidente.
Gapu iti daytoy, suksukimaten dagiti pulis ti rason no apay a timpuak iti Burnham Lake ti nasao a barito ken no anya iti pakainaigan ti nakita a black eye daytoy.
