--Ads--
BAGUIO CITY – Nadiskubre ti maysa a granada ken adu a basyo ti paltog manipud iti maysa a construction site sadiay Andress Bonifacio, Baguio City idi kanikadua.
Nasarakan daytoy ti construction worker a ni Aljon Prado kabayatan ti panagtrabahona iti nasao a lugar.
Dagus met a nagturong sadiay dagiti kameng ti City Mobile Force Company ken ti Station 2 ti Baguio City Police Office para iti panakarekober dagiti nasao a banag.
Narekober dagitoy ti maysa nga M26 grenade a saan pay a bimtak ken 18 a pidaso ti naglati a basyo ti caliber 30.
Naiturong dagiti nasao a banag iti opisina ti City Mobile Force Company bayat a maur-uray ti panakapabettak dagitoy iti Crow Valley sadiay Sta. Juliana, Capas, Tarlac.
