BAGUIO CITY – Pimmusay ti maysa nga ubing a turista kalpasan a nalmes daytoy iti maysa a swimming pool sadiay Taccong, Sagada, Mt. Province idi kanikadua.
Nabigbig daytoy a ni Laurence Carl Merced Valez Monroy, 7-anyos, estudyante ken residente ti Potlod, Nueva Ecija ken temporaryo a nagdagas ti pamilyada iti maysa a homestay sadiay Antadao, Sagada, Mt. Province.
Maibasar iti imbestigasyon dagiti pulis, nagturong ti pamilya ti biktima iti nasao a lugar tapnu aglangoy.
Naamuan a saan a nasiputan dagiti kakadua ti biktima a nagturong daytoy iti adult swimming pool agingga a nadlaw laengen ti lolana a malmales daytoy.
Ginandat ti lola ti biktima nga ispalendaytoy ngem saanna nga ammo ti aglangoy isut gapuna a nagpatulong daytoy kadagiti kakaduada.
Naispal ti biktima babaen iti ulitegna ken dagusda nga inaplikaran ti first aid sakbayda nga inturong iti pagagasan.
Nupay kasta, naideklara a pimmusayen ti nasao nga ubing gapu iti asphyxiation ken cardiopulmonary arrest gapu ti panakalmes daytoy.
Naiyawid metten ti bangkay ti ubing iti lugar dagitoy.
